Unha investigadora singular

Con todos os pés metidos no verán, deitados ricamente ao carón do mar ou sobre a herba seca debaixo dun aguerrido castiñeiro, a mellor opción é coller un bo libro entre as mans e gozar dos mundos que crean para nós. Hoxe imos falar da continuación dunha das mellores obras que ao longo do ano caeron no souto. Ouro Negro é o título que nos ofrece Everest Galicia e continúa coa saga creada por Pereledi (Pere Tobaruela e Ledicia Costas) coa premiada Mortos de Ningures. A inspectora Nola é a protagonista destas dúas fantásticas historias que reúnen todo o que debe ter unha boa lectura: intriga, aventura e diversión. A nosa intéprida axente recibe no seu móbil unha inquietante mensaxe. As vacacións que tiña pensado pasar cos xemelgos vense truncadas por mor dun secuestro, os seus fillos están en perigo! Coa axuda do seu valente gato Lolo, un felino audaz e espelido, non parará ata atopar os seus pequenos e perseguir, unha vez máis o mal que hai detrás de intereses económicos. De recomendada lectura tanto para adultos, como para rapazolos que queiran mergullarse nunha trama que atrapa. Ouro Negro consegue o que xa conseguira Mortos de Ningures que é vivir realmente ao carón da nosa inspectora favorita os problemas que derivan do secuestro. Magnífica unha vez máis a conexión entre estes dous autores, artellando á perfección contidos transversais e valores nunha noveliña adobiada das fantásticas e elaboradas ilustracións de Andrés Meixide.

E todo isto, cun inesperado final, algo que de seguro sorprenderá a máis de un. A que agardas, un verán enteiro para ler!