Un lobiño que amar!

Metidos xa de cheo no mes das festas desta Galiza nosa poboada de mil castiñeiros, no souto estamos a gozar da lectura e tamén do lecer, do non facer nada. E reparamos en todos os contos que temos amoreados e non queremos deixar de facer unha mención especial a un en concreto, que sobresae pola súa orixinalidade. Nesta entrada do souto imos falar de Quen lle ten medo á Carapuchiña Vermella?, Sara Sahinkanat e Ayse Inan Alican, adaptado por Manuel Ramos ao galego e publicado por Ediciones Linteo. Para quen non coñeza Ediciones Linteo recomendamos que se mergulle no seu catálogo de infantil, pois esta editora ourensá conta con propostas moi orixinais e divertidas para os máis pequenos. Quen lle ten medo á Carapuchiña Vermella? achega dunha maneira ideal outra perspectiva do clásico conto de Carapuchiña dándonos outra visión, moderna e inusual dos perigos que se agochan no bosque. Neste caso é o lobo o protagonista, máis concretamente un lobiño, que ten moito respecto polo cazador e pola Carapuchiña. Un simpático volume que é moi útil para traballar cos pequenos cuestións como a responsabilidade, o pórse na pel do outro, o feito de obedecer... Todo con moita tenrura e cunhas ilustracións de premio en cores vivas con moitos detalliños!

 O lobiño abrangueu coas mans a cariña da súa nai. "Miña nai", dixo, agora que xa son grande, gustaríame ir ao bosque eu só, para dar unha volta e respirar aire fresco. A nai mirouno amorosamente. "Escoita atentamente, meu amor, vexamos se estás preparado. Teño que facerche algunhas preguntas, xa que vexo que non tes medo".