7.06.2012

Unha flor que mimar

De cando en vez agroma unha flor entre as mil follas ciscadas no souto. De cando en vez abrollan no noso souto versos que coma gotas de orballo arrecenden a gargalladas de pícaros besbellados. Versos en flor é o segundo libro de poesía infantil de Carlos Fontes. De novo, coa colaboración plástica de Leandro Lamas, o grande entre os grandes, que habita nas nosas casas, que preside os nosos soños coa maxestosidade e xenialidade do seu pincel. Os dous xa sorprenderan con Poemas con piruleta, poemario dirixido aos máis cativos da casa e que moitos nenos e nenas de Galicia aprenderon practicamente de memoria. Neste novo proxecto poético, volvemos atoparnos coa festa de cor e lírica aos que xa nos teñen acostumados estes dous artistas, das palabras e do lienzo. Un volume que alcanza a rima perfecta de gran riqueza lingüística e moi acaído para traballar cos pequenos o ritmo e a palabra. Pingas de sabedoría cativa entrelázanse co maxistral uso que da cor fai o gran Leandro. Unha xenialidade levada a papel que fai desta obriña unha xoia para o regalo, para o goce daqueles que aman a palabra. Palabras que non se descompoñen e se o fan gardan a ritma pra construír sentidos, olfactos, oficios, animais... Recomendación para os mestres desta terra que atesouran e transmiten o gran legado: o principio irrenunciable dunha lingua que hai que conservar.





Na entrada de hoxe salientamos o gran traballo dos autores e felicitamos a Galaxia por apostar pola calidade. Pódelo atopar dentro da Colección Tartaruga de Infantil e a un prezo de 6,50 euros. Un libro para gozar da palabra e saber que a vida é un lugar fermoso.


1 comentário:

  1. Vendo os Tartaruga que seguiron ós que fixen, non podo menos que arrubiar. Podería poñer como escusa o feito de ter que facer seis libros e o rediseño da colección nun mes (20 días) Pero non é escusa. Fantásticos traballos tódolos posteriores ós meus nesta colección. Apertas

    ResponderEliminar